Joriy yilning 29-iyul kuni O‘zbekiston Respublikasi Oliy ta’lim, fan va innovatsiyalar vazirligida 28-iyul kuni boshlangan O‘zbekiston–Koreya hamkorligidagi LUPIC xalqaro ta’lim forumi hamda “Smart industriya innovatsiyalari” mavzusidagi Ta’lim–sanoat hamkorligi tarmoq seminari o‘z ishini davom ettirdi.

Mazkur nufuzli xalqaro tadbir “TIQXMMI” Milliy tadqiqot universiteti va Janubiy Koreyaning Keimyung College University hamkorligida amalga oshirilayotgan LUPIC (Leading Universities Project for International Cooperation) xalqaro loyihasi  (2024-2029) doirasida tashkil etildi.

Forumning asosiy maqsadi O‘zbekiston va Janubiy Koreya o‘rtasidagi ta’lim hamkorligini yanada rivojlantirish, kasbiy ta’lim sifatini oshirish, ta’lim dasturlarini sanoat ehtiyojlariga moslashtirish, xalqaro ilg‘or tajribalarni o‘rganish hamda zamonaviy texnologiyalar asosida raqobatbardosh mutaxassislar tayyorlash tizimini takomillashtirishdan iborat bo‘ldi.

Tadbirda Oliy ta’lim, fan va innovatsiyalar vazirligi vakillari, Kasbiy ta’lim agentligi mutasaddilari, texnikum va oliy ta’lim muassasalari rahbarlari, xalqaro tashkilotlar vakillari, professor-o‘qituvchilar hamda Janubiy Koreyadan tashrif buyurgan ekspertlar ishtirok etdilar.

Forum doirasida Janubiy Koreyaning Keymyung Kollej Universiteti professor va ekspertlari tomonidan kasbiy ta’limni rivojlantirish, sanoat ehtiyojlariga mos o‘quv dasturlarini ishlab chiqish, raqamli ta’lim texnologiyalaridan foydalanish hamda sun’iy intellekt asosida zamonaviy o‘quv materiallarini yaratish bo‘yicha qator ma’ruzalar va amaliy taqdimotlar o‘tkazildi.

Jumladan, LUPIC loyihasining Janubiy Koreyadagi koordinatori professor Lee Sangeoug tomonidan loyiha doirasida amalga oshirilayotgan ishlar, xalqaro hamkorlik yo‘nalishlari hamda kelgusidagi istiqbolli rejalar haqida batafsil ma’lumot berildi.

Forumning ikkinchi kuni doirasida Janubiy Koreyaning Keymyung Kollej Universiteti professor va ekspertlari tomonidan kasbiy ta’limni rivojlantirish, innovatsion yondashuvlarni joriy etish va raqamli texnologiyalardan samarali foydalanish yo‘nalishlarida qator dolzarb mavzularda taqdimotlar o‘tkazildi.

Jumladan, professor Lee Sung-ha tomonidan LUPIC loyihasining maqsad va vazifalari, amalga oshirish mexanizmlari hamda xalqaro hamkorlik istiqbollari yoritildi. Professor Kim Miseong tomonidan sanoat ehtiyojlariga asoslangan ta’lim jarayonini loyihalash va amalga oshirish tajribalari taqdim etildi.

Shuningdek, professor Jung Seyoung tomonidan sun’iy intellekt asosida o‘quv dasturlarini ishlab chiqish metodlari va ularni takomillashtirish yondashuvlari, professor Kwon Yu-jin tomonidan esa sun’iy intellekt yordamida zamonaviy o‘quv materiallarini yaratish usullari bo‘yicha ilg‘or tajribalar taqdim etildi.

Forum doirasida “TIQXMMI” Milliy tadqiqot universitetida LUPIC loyihasi asosida tashkil etilgan DEISC (Digital Education & Innovation Support Centre) – Raqamli ta’lim va innovatsiyalarni qo‘llab-quvvatlash markazi faoliyatiga alohida e’tibor qaratildi.

DEISC markazi koordinatori, “TIQXMMI” Milliy tadqiqot universiteti dotsenti hamda LUPIC loyihasining O‘zbekistondagi koordinator yordamchisi Go‘zal Eshchanova tomonidan markaz faoliyati, loyiha doirasida amalga oshirilgan ishlar, asosiy faoliyat yo‘nalishlari, jumladan, raqamli ta’limni rivojlantirish, innovatsion texnologiyalarni ta’lim jarayoniga joriy etish, pedagoglarning raqamli kompetensiyalarini oshirish hamda xalqaro tajribalarni kasbiy ta’lim tizimiga tatbiq etish bo‘yicha amalga oshirilayotgan ishlar keng yoritildi.

Muhokamalar davomida DEISC markazini yanada rivojlantirish, Kasbiy ta’lim agentligi hamda O‘zbekiston texnikumlari bilan hamkorlikni kengaytirish, qo‘shma ilmiy-amaliy loyihalarni amalga oshirish, xalqaro tajribalarni kasbiy ta’lim tizimiga joriy etish va ta’lim–sanoat integratsiyasini kuchaytirish bo‘yicha muhim takliflar bildirildi.

Forum yakunida Kasbiy ta’lim agentligida LUPIC loyihasi doirasidagi kelgusidagi hamkorlik yo‘nalishlariga bag‘ishlangan uchrashuv tashkil etildi. Unda O‘zbekiston texnikumlari va Keymyung Kollej Universiteti o‘rtasidagi hamkorlikni yangi bosqichga olib chiqish masalalari muhokama qilindi.

Xususan, texnikumlarda koreys tilini o‘qitishni rivojlantirish, talabalar va pedagoglar uchun akademik almashinuv dasturlarini yo‘lga qo‘yish, qo‘shma ta’lim dasturlarini ishlab chiqish, zamonaviy o‘quv dasturlari va o‘quv-uslubiy materiallarni birgalikda yaratish, shuningdek, dual ta’lim asosida sanoat korxonalari bilan hamkorlikni mustahkamlash bo‘yicha istiqbolli rejalar belgilab olindi.

Tadbirni yuqori saviyada tashkil etishda LUPIC loyihasi ishtirokchilarining samarali hamkorligi va tashkiliy ishlari muhim ahamiyat kasb etdi. Jumladan, “TIQXMMI” Milliy tadqiqot universiteti rektori, LUPIC loyihasining O‘zbekistondagi koordinatori professor Mirzayev Bahodir Suyunovich, LUPIC loyihasining Janubiy Koreyadagi koordinatori Dr. Lee Sangeoug, loyiha a’zolari hamda Koreya delegatsiyasi vakillarining mazkur xalqaro tashabbusni amalga oshirishdagi hissasi alohida e’tirof etildi.

Shuningdek, forumni muvaffaqiyatli tashkil etishda Koreya tomoni bilan yaqindan hamkorlik qilgan DEISC markazi koordinatori Go‘zal Eshchanova, DEISC assistentlari Aziz Nigmatov va Sanjar Ungalovlarning tashkiliy ishlari alohida ta’kidlanib, ularga minnatdorlik bildirildi.

Mazkur xalqaro forum O‘zbekiston va Janubiy Koreya o‘rtasidagi kasbiy ta’lim sohasidagi strategik hamkorlikni yanada mustahkamlash, texnikumlarda xalqaro tajriba asosida zamonaviy ta’lim muhitini shakllantirish, raqamli ta’lim va innovatsiyalarni rivojlantirish hamda kelajak uchun yuqori malakali mutaxassislar tayyorlash yo‘lidagi muhim qadam bo‘ldi.