Ijodiy imtihonlarda ochiqlik va shaffoflik — ustuvor vazifa.

09.07.2026

#Ma`naviy va tashkiliy #Yangilik

Universitetda Jismoniy tarbiya va sport kafedrasi bo‘yicha abiturientlar uchun o‘tkazilayotgan ijodiy (kasbiy) imtihonlar jarayonida ochiqlik, shaffoflik va xolislikni ta’minlash, korrupsiyaviy holatlarning oldini olish maqsadida profilaktik tadbir hamda davra suhbati tashkil etildi.

Tadbirni Korrupsiyaga qarshi kurashish «Komplaens nazorat» tizimini boshqarish bo‘limi boshlig‘i A. Gapparov olib bordi. Suhbat davomida ishtirokchilar universitet rektorining ijodiy (kasbiy) imtihonlarni tashkil etish va o‘tkazish to‘g‘risidagi buyrug‘i mazmun-mohiyati bilan tanishtirildi.

Shuningdek, imtihon jarayonlarida qonunchilik talablariga qat’iy rioya qilish, barcha abiturientlarga teng imkoniyatlar yaratish, manfaatlar to‘qnashuviga yo‘l qo‘ymaslik, xizmat vazifalarini vijdonan bajarish hamda korrupsiyaviy xavf-xatarlarni keltirib chiqarishi mumkin bo‘lgan har qanday xatti-harakatlardan tiyilish yuzasidan atroflicha tushuntirishlar berildi.

Davra suhbatida qabul komissiyasining mas’ul kotibi E. Toshmatov, mas’ul kotib yordamchisi N. Eshpo‘latov, imtihon oluvchi mutaxassislar ham ishtirok etib, ijodiy imtihonlarni yuqori saviyada, ochiq va shaffof tarzda tashkil etish, baholashning adolatliligini ta’minlash hamda korrupsiyaning har qanday ko‘rinishiga nisbatan murosasiz munosabatni shakllantirish yuzasidan o‘z fikr-mulohazalari bilan o‘rtoqlashdilar.

Tadbir yakunida barcha mas’ullarga imtihonlarni belgilangan tartib asosida, xolis va shaffof o‘tkazish, universitetning korrupsiyaga qarshi siyosati talablariga qat’iy amal qilish hamda jamoatchilik ishonchini ta’minlash muhim vazifa ekani yana bir bor ta’kidlandi.