Zamonamiz ta’limida “Kun qaxramoni”

20.04.2026

#Ma`naviyat

Joriy yilning 20-aprel kuni bo‘lib o‘tgan “Besh avlod uchrashuvi” nafaqat bir tadbir, balki ta’lim va tarbiya sohasidagi uzviylik, ustoz-shogird an’analarining yorqin ifodasi sifatida alohida ahamiyat kasb etdi. Ushbu mazmunli anjuman Professional ta’lim kafedrasi professori Ismailova Zuxra Karabaevnaning tavallud kuni munosabati bilan tashkil etilgani bilan yanada fayzli va xotirjam muhitda o‘tdi.

Kafedrada va universitet miqyosida o‘zining samarali ilmiy faoliyati, yuksak mas’uliyati va fidokorona mehnati bilan tanilgan Z. Ismailova haqiqatan ham “KUN QAHRAMONI” degan yuksak e’tirofga munosib shaxsdir. Ustozning ko‘p yillik ilmiy izlanishlari, amaliy natijalarga yo‘naltirilgan tadqiqotlari va ta’lim sifatini oshirishga qaratilgan yondashuvlari bugungi zamonaviy ta’lim taraqqiyotiga munosib hissa bo‘lib qo‘shilmoqda. Ayniqsa, ularning professional ta’lim sohasidagi ilmiy qarashlari va metodik tavsiyalari yosh mutaxassislarni tayyorlashda muhim ahamiyat kasb etmoqda.

Zuxra Karabaevna nafaqat yetuk olim, balki samimiy ustoz sifatida ham talabalar va yosh tadqiqotchilar qalbida chuqur hurmat qozongan. U kishi shogirdlariga nafaqat bilim, balki hayotiy tajriba, ilmiy madaniyat va insoniy qadriyatlarni ham bag‘ishlab kelmoqda. Ustoz va shogird o‘rtasidagi samimiy muloqot, o‘zaro ishonch va qo‘llab-quvvatlash muhiti aynan shunday insonlar faoliyati orqali shakllanadi.

“Besh avlod uchrashuvi”da turli avlod vakillarining bir davrada jam bo‘lishi esa Z. Ismailovaning boy ilmiy maktabi va keng qamrovli ta’sir doirasini yaqqol namoyon etdi. Bu uchrashuv ilm-fanning uzviyligi, an’ana va innovatsiya uyg‘unligining yorqin timsoliga aylandi.

Shuni ta’kidlash joizki, bunday fidoyi ustozlar jamiyat taraqqiyotining asosiy ustunlaridan biri hisoblanadi. Zuxra Karabaevna Ismailova kabi ilm ahli o‘zining yuksak salohiyati, samimiyligi va beqiyos mehnati bilan nafaqat bugungi kunning, balki kelajak avlodlarning ham haqiqiy qahramonidir.

 

 “Professional ta’lim”

kafedrasi mudiri D.I.Muqumova axboroti

 

Universitet matbuot xizmati