Akademik almashinuv dasturi amalda

10.04.2026

#Xalqaro hamkorlik

Joriy yilning 8-aprel kuni Qozog‘iston Respublikasining Qo‘rqit-ota nomidagi Qizilo‘rda universiteti “Elektroenergetika” mutaxassisligi bo‘yicha tahsil olayotgan 5 nafar magistr “Toshkent irrigatsiya va qishloq xo‘jaligini mexanizatsiyalash muhandislari instituti” Milliy tadqiqot universitetiga akademik almashinuv dasturi doirasida tashrif buyurishdi. Mazkur tashrif ikki oliy ta’lim muassasasi o‘rtasida yo‘lga qo‘yilgan qo‘shma ta’lim dasturining amaliy natijasi bo‘lib, talabalar o‘rtasida ilmiy hamkorlikni mustahkamlash, zamonaviy bilim va ko‘nikmalar almashinuvini ta’minlashga qaratilgan.

Tashrifning birinchi kunida xorijiy magistrantlar universitetning ilmiy va o‘quv infratuzilmasi bilan yaqindan tanishtirildi. Jumladan, zamonaviy ilmiy-o‘quv laboratoriyalarda olib borilayotgan tadqiqotlar, innovatsion ishlanmalar va texnologik jarayonlar bilan tanishish imkoniga ega bo‘ldilar. Shuningdek, universitet texnoparkida amalga oshirilayotgan startap loyihalar, yosh olimlar tomonidan yaratilayotgan innovatsion qurilmalar va ularning tijoratlashtirish jarayonlari haqida batafsil ma’lumot berildi. Zamonaviy kutubxona faoliyati, uning elektron resurslari, ilmiy ma’lumotlar bazalari va xalqaro platformalarga kirish imkoniyatlari ham talabalarda katta qiziqish uyg‘otdi. Kunning ikkinchi yarmida esa “Elektr ta’minoti va qayta tiklanuvchan energiya manbalari” kafedrasi professor-o‘qituvchilari tomonidan o‘quv-amaliy mashg‘ulotlar tashkil etildi. Xususan, kafedra katta o‘qituvchisi A.Davirov tomonidan “Rele himoyasi va avtomatikasi” fanidan laboratoriya mashg‘ulotlari o‘tkazildi. Ushbu mashg‘ulotlar davomida magistrantlar zamonaviy elektr tizimlarida qo‘llaniladigan himoya vositalari, avtomatik boshqaruv tizimlari, relelarning ishlash prinsiplari hamda favqulodda holatlarda tizimni himoyalash mexanizmlari bilan amaliy tarzda tanishdilar. Laboratoriya jarayonlari interaktiv tarzda olib borilib, talabalarning bilimlarini mustahkamlash hamda ularning amaliy ko‘nikmalarini rivojlantirishga alohida e’tibor qaratildi.

Mazkur akademik almashinuv dasturi doirasidagi tashrif talabalar uchun nafaqat nazariy bilimlarini boyitish, balki xalqaro tajribani o‘rganish, yangi ilmiy yondashuvlarni egallash hamda kelgusidagi ilmiy-tadqiqot faoliyatlari uchun muhim asos yaratish imkonini bermoqda. Shuningdek, bu kabi tashriflar ikki universitet o‘rtasidagi hamkorlikni yanada mustahkamlash, qo‘shma ilmiy loyihalarni kengaytirish va ta’lim sifatini xalqaro darajada rivojlantirishda muhim ahamiyat kasb etadi. Ayni vaqtda qo‘shma ta’lim dasturi doirasida xorijiy magistr talabalariga kafedra professor-o‘qituvchilari tomonidan dars mashg’ulotlari olib borilmoqda.

 

Ma’lumot beruvchi “ET va QTEM” kafedrasi katta o‘qituvchisi N.Abdug‘aniyev

Universitet matbuot xizmati