Universitet jamoasi “Yashil makon” umummilliy loyihasiga hissa qo‘shdi
29.11.2025
“TIQXMMI” Milliy tadqiqot universiteti jamoasi tomonidan Toshkent viloyati, O‘rta Chirchiq tumanida “Yashil makon” umummilliy loyihasi doirasida keng ko‘lamli ko‘chat ekish tadbiri amalga oshirildi. Tadbir davomida jami 850 dona manzarali daraxt ko‘chatlari ekildi.
Mazkur ekologik tashabbus atrof-muhitni obodonlashtirish, yashil hududlarni kengaytirish va aholining ekologik madaniyatini oshirishga qaratilgan. Universitet jamoasi a’zolari keng jamoatchilik bilan birga faol ishtirok etib, hududning yanada ko‘rkamlashishiga o‘z amaliy hissasini qo‘shdi.
Ko‘chat ekish jarayonida tuproq tayyorlash, daraxtlarning joylashuvi, parvarish bo‘yicha tavsiyalar ham inobatga olindi. Ushbu ezgu tashabbus nafaqat tabiatni asrashga, balki talaba-yoshlarning ekologik mas’uliyatini mustahkamlashga xizmat qildi.
Universitetimiz bundan buyon ham “Yashil makon” kabi umummilliy tashabbuslarni qo‘llab-quvvatlab, ekologik barqarorlik yo‘lida faol ishtirok etishni davom ettiradi.
