Navro‘z – odamlarni birlikka, bag‘rikenglikka va ezgulikka chorlashi bilan ham ahamiyatlidir. U turkiy va fors tilli xalqlarning birlashuvi, milliy qadriyatlar, urf-odatlar va an’analarni asrab-avaylashga xizmat qiluvchi umumxalq bayrami. Navro‘z – insonlar o‘rtasida mehr-oqibatni mustahkamlaydigan, oila va jamiyat birdamligini kuchaytiradigan bayram. Bu kunda odamlar bir-birini tabriklaydi, mehmonga borish, kattalarni ziyorat qilish va hurmat ko‘rsatish muhim an’analardan hisoblanadi.

O‘zbekiston Respublikasi Prezidenti Shavkat Mirziyoyevning Navro‘z umumxalq bayramiga bag‘ishlangan tantanali marosimdagi nutqi ana shunday istaklar bilan yo‘g‘rildi.

Prezident bu galgi Navro‘z muqaddas Ramazon oyida, uning tabarruk fazilatlariga uyg‘un holda o‘tayotganini alohida ta’kidladi. Qalblarimiz shodlikka to‘lgan shunday barokatli kunlarda yurtimiz mo‘min-musulmonlarini, butun islom ummatini Ramazoni sharif bilan uyg‘un kelgani ham e’tiborga molik.

Davlatimiz rahbari Navro‘zni xalqimiz asrlar davomida og‘ir va mashaqqatli, sinovli paytlarda ham bu bayramni olijanob tabiati va qadriyatlari bilan asrab-avaylab kelgani chinakam mo‘jiza deya ta’rifladi.

Yaratuvchanlik ishtiyoqi, g‘ayrat va shijoati, o‘zaro hamjihatlik, mehr-oqibat va saxovat kabi olijanob fazilatlari Navro‘z timsolida yanada yorqin namoyon bo‘ladi.

Abu Rayhon Beruniy: "Navro‘z – insoniyatning tabiat bilan uyg‘unlikda yashashga intilishini anglatuvchi muqaddas bayram"-deya bejiz ta’rif bermagan.

Navro‘z kunlarida bobo dehqonlarimiz rizq-ro‘zimiz, dasturxonimiz qut-barakasini o‘ylab, ona zaminga o‘z mehrini beradi, mo‘l hosil olish niyatida qattiq bel bog‘laydi. Shu ma’noda, Mir Alisher Navoiy bobomizning “Dehqonki, dona sochar, yerni yormoq bilan rizq yo‘lin ochar” degan so‘zlarida chuqur hayotiy ma’no mujassamligi haqli e’tirof etildi.

Navro‘zona tuyg‘ular, yuksak bunyodkorlik ruhi Yangi O‘zbekistonimizda amalga oshirilayotgan ulkan islohotlar va jadal o‘zgarishlarning asl mazmuni va ezgu g‘oyalariga hamohangdir. “Yashil makon” umummilliy loyihasi doirasida diyorimizda yangi ekologik muhit yaratilayotgani zamirida ham ana shu haqiqat bor.

Navro‘z – yoshlik va shijoat ayyomidir. Hayotga katta orzu-umidlar bilan kirib kelayotgan yoshlarimiz Yangi O‘zbekistonning ilg‘or va qudratli kuchiga aylanib borayotganiga barchamiz guvohmiz, - dedi prezident. Azmu shijoatli, iste’dodli farzandlarimizning dadil va mardona harakatlari butun dunyoda katta aks-sado berayotgani quvonchli hodisa ekani ta’kidlandi.

          Mamlakatimiz bayrog‘ini yuqori, nufuzli musobaqalarda baland ko‘targan sportchi yoshlarimiz va boshqa jabhalarda o‘rnak bo‘layotgan yosh avlod shijoati ham qayd etildi.

Prezident ayricha g‘urur bilan Navro‘z faslida tavallud topgan  Abduxoliq G‘ijduvoniy, Bahouddin Naqshband, Mirzo Ulug‘bek, Zulfiyaxonim, Ozod Sharafiddinov, Abdulla Oripov kabi mutafakkir zotlarni chinakam ibrat namunasi ekanini ham ta’kidlab o‘tdi.

Mana tabrik nutqidagi davlatmiz rahbarining g‘ururli da’vati: “Hech qachon unutmangki, ortingizda salkam 38 millionlik buyuk xalq, Prezident turibdi.”

Bu yil yurtimizda mahalla raislari saylovlari bo‘lib o‘tishi, 22 mart kuni mamlakatimizda keng nishonlanadigan Mahalla tizimi xodimlari kuni bilan barcha yurtdoshlarimizni, mahalla faollarini samimiy tabrikladi.

Tabrik nutqini boshqalar qatori  men ham tinglarkanman, ushbu xitob kuch qudratimiz va g‘alabalarimiz garovi sifatida quloqlarim ostida to hanuz jaranglamoqda. “Bizning kuchimiz – birlik va ahillikda, qudratimiz – Vatanga mehr va sadoqatda, yutug‘imiz – o‘zimizga bo‘lgan yuksak ishonchimizda!!

Navro‘z Birlashgan Millatlar Tashkiloti tomonidan xalqaro bayram sifatida e’tirof etilgani, u hozirgi kunda barcha elu elatlarni, jumladan, Markaziy Osiyo xalqlarini yanada jipslashtirayotgani quvonarlidir.

Prezidentimizning tabrik nutqida nafosatli navro‘zning ohorli samimiyati va beg‘uborligi, xalqimizga bo‘lgan chin mehru sadoqat va ishonch hissi ufurib turganligini sezmaslik mumkin emas.

          Navro‘z - bu faqatgina bayram emas, balki yurakdagi umid va orzularning qayta tirilishidir. Bu kun bizga yangi boshlanish, yangi imkoniyatlar va yangi baxtlarni va’da qiladi. Sizga va oilangizga bu bayramning barcha xushnudchiliklari nasib etsin!

 Navro‘z hammamizga muborak bo‘lsin!

Rahimboy JUMANIYOZOV,

“TIQXMMI” MTU professori,
O‘zbekiston Yozuvchilar va Jurnalistlar uyushmalari a’zosi