Natijador seminar-trening - yoshlar tarbiyasi: Milliy qadriyat va “Ommaviy madaniyat”

04.03.2025

#Ma`naviyat

2025 yil 3-4 mart kunlari O‘zbekiston xalqaro islom akademiyasida “Yoshlar tarbiyasi: Milliy qadriyat va “Ommaviy madaniyat” mavzusidagi seminar-trening o‘z ishini boshladi.

Ushbu treninglardan ko‘zlangan asosiy maqsad – yurtimizda xotin-qizlarga yaratilayotgan imtiyoz va imkoniyatlarni keng targ‘ib etish, yoshlarni milliy qadriyatlar asosida oilaviy hayotga tayyorlash, ular o‘rtasida jinoyatchilik, zo‘ravonlikka barham berishda o‘zaro tajriba almashish, ta’lim muassasalarida ijtimoiy-ma’naviy muhitni sog‘lomlashtirish, Xotin-qizlar maslahat kengashi raisi va psixologlarning ko‘nikma va malakasini oshirishdan iborat.

Mazkur o‘quvlar Oliy taʼlim, fan va innovatsiyalar vazirligi, Din ishlari boʻyicha qoʻmita hamda O‘zbekiston xalqaro islom akademiyasi hamkorligida tashkil etildi.

Unda “Toshkent irrigatsiya va qishloq xoʻjaligini mexanizatsiyalash muhandislari instituti” Milliy tadqiqot universiteti  xotin-qizlar maslahat kengashi raisi Zukhra Ismailova va shu universitet psixologi Dilafruz Yusupova ishtirok etdilar.

Seminarni O‘zbekiston xalqaro islom akademiyasi rektori Muzaffar Komilov, Din ishlari bo‘yicha qo‘mita raisining o‘rinbosari Matluba Qahhorova, Oliy Majlis Senatining Yoshlar, xotin-qizlar, madaniyat va sport masalalari qo‘mitasi raisi Orzigul Qozixonova, Oliy, fan va innovatsiyalar vaziri xotin-qizlar maslahat kengash raisi, psixolog Dildora Solixo‘jayeva kirish so‘zi bilan ochib berib, tinglovchilarga muvaffaqiyat tiladilar.

Bugungi o‘quvlar davomida Akademiya professor-o‘qituvchilari, malakali psixologlar, soha mutaxassislari tomonidan “Xotin-qizlar oʻrtasida maʼnaviy-maʼrifiy faoliyatni takomillashtirish, buzgʻunchi va yot gʻoyalar taʼsiridan asrash, milliy, diniy va umuminsoniy qadriyatlarni targʻib etish mexanizmlari, ijtimoiy maʼnaviy muhitni sogʻlomlashtirish masalalari”, “Jamiyat barqarorligiga tahdid soluvchi radikal qarashlar va ularning oldini olish yoʻllari”, “Islom dinining bagʻrikenglik tamoyillari”, “Islom manbalarida yot gʻoyalarga qarshi raddiyalar”, “Islom dinida xotin-qizlar maqomi” va shu kabi dolzarb mavzudagi ma’ruzalar tinglanadi.

Seminar-trening yakunida Oʻzbekiston Respublikasi oliy ta'lim,fan va innovasiyalar vaziri va O‘zbekiston xalqaro islom akademiyasi rektori Muzaffar Komilovlar tomonidan imzolangan Malaka oshirish Sertifikatlari topshirildi. Shu bilan birga Respublikada faoliyat olib borayotgan universitetlarda koʻp yillardan beri samarali ishlab kelayotgan xotin-qizlar maslaxat kengashi raislariga Oliy ta'lim, fan va innovasiyalar vaziri tomonidan Faxriy yorligʻi bilan taqdirlandilar.

Seminar-treningda olingan barcha bilimlarni endilikda xotin-qizlar maslaxat kengashlari raislari va psixologlar tomonidan ish faoliyatida talabalar bilan va professor-oʻqituvchilar bilan birgalikda amalda joriy etish va yaxshi natijadorlikni koʻrsata olish endilikdagi oldimizga qoʻyilgan katta vazifalardan biri sifatida qabul qilindi. Bu ishlarni barchasiga tashabbuskorlik qilib kelayotgan xotin-qizlar maslaxat kengashiga Oliy ta'lim, fan va innovasiyalar vazirligi tomonidan bevosita rahbarlik qilib kelayotgan Solixoʻjaeva Dildoraxonga katta minnatdorchilik bildirib qolamiz.