“Qadri baland, o‘zi ulug‘ Ustozim” tadbirida
30.09.2024
Bugun universitetimizning Madaniyat saroyi sahnasi bayramona bezatildi. Buning boisi “O‘qituvchi va murabbiylar” bayrami munosabati bilan tantanali konsert dasturi tashkil etildi. Zalda universitetimizda faoliyat yuritayotgan professor o‘qituvchilar jamul jam bo‘lishdi.
Axborot siyosati masalalari bo‘yicha rektor maslahatchisi, universitet matbuot kotibi R.Jumaniyozov uzrli sabab ishtirok etaolmayotganlari uchun universitet rektori B.S.MIRZAYEV tomonidan tayyorlangan tabrik nutqni o‘qib eshittirdi.
Ta’lim va tarbiya jarayoniga, mamlakatimiz kelajagiga, vatanparvar, ilmli yoshlarning istiqboliga mas’ul bo‘lgan ustozlarning kasbiy bayrami arafasida uloarni maroqli dam olib hordiq chiqarishlari uchun taniqli san’atkorlar ijrosida konsert dasturi uyushtirildi.
Barcha kuch va imkoniyatlarimizni yoshlarimizning intellektual va jismoniy kamoloti, ularning sifatli ta’lim olib, hayotda munosib o‘rin egallashlari uchun safarbar etarkanmiz, muhtaram Prezidentimiz rahnamoligida ilmu ta’lim murabbiy va muallimlarimizga berilayotgan e’tibordan g‘oyat mamnunmiz.
“Qadri baland, o‘zi ulug‘ Ustozim” deb nomlangan ma’naviy-ma’rifiy bayram dasturida O‘zbekiston Respublikasida xizmat ko‘rsatgan san’atkorlar Abduqayum Yo‘ldoshev, Dilfuza Rahimova, G‘iyos Boytoyevlarning ishtiroki va jozibador san’atlari ustozlarga huzur bag‘ishladi. Ayni paytda filarmoniya solisti Hojiakbar Haydarov va Yunus Rajabiy nomidagi O‘zbek musiqa san’ati institutining talabasi, xalqaro tanlovlar g‘olibasi Mavluda Hamidova, Yunusobod tumanidagi 13-sonli musiqa maktabi raqqosa qizlarining chiqishlari ham davraga fayz kiritdi. Universitetimizning xor jamoasi hamda “Maftunkor” raqs dastasining namoyishi ham olqishlar bilan kutib olindi. Ijodkor talabalardan tarkib topgan “Ilhom buloqlari” to‘garagining a’zolari o‘z ijodlaridan namunalar o‘qib berishdi.
Xulosa o‘rnida shuni aytish joizki, universitetimiz pedagoglar jamoasi ma’naviy hordiq chiqarib, kuy va raqslarga tushdilar va tashkilotchiligi uchun rahbariyatga minnatdorchiliklar bildirishdi.
Universitet matbuot xizmati
