Vazir bilan birgalikda

01.08.2024

#Yangilik

Kecha Iste’dodli yoshlarni qo’llab-quvvatlash “Ulug’bek” jamg’armasi binosida Oliy ta’lim, fan va innovatsiyalar vaziri Kongratbay Sharipovning ta’limdagi jarayonlar va islohotlar borasidagi ma’ruzalari samimiy va ochiq tarzda bo’lib o’tdi. “Ilm-fan va ta’lim tizimida amalga oshirilayotgan islohotlar va ularning natijalari” mavzusidagi ma’ruza ishtirokchilarda iliq taassurot uyg’otdi.

Unda poytaxtdagi Oliy ta’lim muassasalaridan kelgan Yoshlar bilan ishlash, ma’naviy-ma’rifiy ishlar bo’yicha prorektorlar va boshqa mas’ullar ishtirok etishdi. Tadbir ZOOM platformasi orqali barcha OTMlarga ham uzatib turildi. 

Tadbirni jamg’arma raisi, akademik Oqil Umurzakovich Salimov olib bordi. Vazirimizning yaqinda Qashqadaryo, Farg’ona va Qoraqalpog’istonda bo’lib qaytishi, Prezidentimizning ta’lim sohasidagi islohotlarining mazmun-mohiyatining amaldagi ifodasini ko’rib kengqamrovli xulosalarga ega bo’lgani ayni damda o’z maslahatlarini berib kelgani ham e’tiborga molikdir.  

Ma’ruzada oliy ta’lim tizimida qabul jarayonlarini tashkil etish, grant o‘rinlarini taqsimlash bo‘yicha amalga oshirilgan qator islohotlar, ijtimoiy-rag‘batlantiruvchi qonunchilikda belgilangan imtiyozlar, hududlar, sohalar va tarmoqlarning oliy ma’lumotli kadrlarga bo‘lgan ehtiyojini ta’minlash uchun davlat buyurtmasi parametrlari doirasida maqsadli qabul kvotalari ajratilishi, magistratura mutaxassisliklari va oliy ta’limdan keyingi ta’lim ixtisosliklariga qabul qilishda xorijiy tilni bilish darajasini belgilovchi milliy yoki xalqaro sertifikatlar talabi, 2024/2025 o‘quv yilidan boshlab davlat oliy va professional ta’lim muassasalariga (kasb-hunar maktabi bundan mustasno) qabul qilish bo‘yicha imtihonlar «avval test, so‘ng tanlov» tamoyiliga muvofiq bir vaqtda o‘tkazilishi belgilanganligi, muhandislik sohalarida kadrlar tayyorlash va oliy ta’lim muassasalari faoliyatini yanada takomillashtirish masalalari, ta’lim sifatini ta’minlash va o‘quv jarayonini tashkil qilish yo‘nalishida amalga oshirilayotgan ishlar, O‘zbekiston Respublikasi Prezidenti tomonidan belgilab berilgan muhandislik sohalarida kadrlar tayyorlovchi oliy ta’lim muassasalari rektorlari tomonidan kelgusida amalga oshirilishi lozim bo‘lgan muhim ustuvor vazifalar, yoshlarni Vatanparvarlik ruhida tarbiyalash va ma’naviy-ma’rifiy, ilm-fan va innovatsiyalar, xalqaro hamkorlik hamda raqamlashtirish yo‘nalishlarida amalga oshirilayotgan ishlar va ularning natijalari bo‘yicha ma’lumotlar ishtirokchilar e’tiboriga havola etildi.

Ma’ruza mavzusi bo‘yicha ishtirokchilar tomonidan juda ko‘plab qiziqarli savollar va takliflar berildi.

Universitetimizning tyutor va bo’lim boshliqlari savol-javoblar bobida faollik ko’rsatishdi. Vazir barcha savollarga aniq, lo’nda va ilmiy-nazariy asoslari bilan javob qaytardi.

Tadbir nihoyasida ustozlar bilan birga rasmga tushishga ham muvaffaq bo’ldik.

 

Universitet matbuot xizmati