Istanbuldagi xalqaro kongressda “TIQXMMI” Milliy tadqiqot universiteti moderatorligida O‘zbekiston universitetlari maxsus sessiyasi tashkil etildi

17.06.2025

#Xalqaro hamkorlik

2025-yil 16-19-iyun kunlari Istanbul shahrida bo‘lib o‘tayotgan Global Sustainable Development Congress (GSDC 2025) — Times Higher Education (THE) xalqaro reyting agentligi tomonidan tashkillashtirilgan eng yirik xalqaro ilmiy forumlardan biri sanaladi. Mazkur kongress butun dunyodan 5000 dan ortiq ilmiy tashkilotlar, universitetlar va mutaxassislarni jamlab, Barqaror rivojlanish maqsadlari (SDGs) doirasida ta’lim va ilm-fan salohiyatini muhokama qilish va bu bo’yicha xalqaro hamkorlik aloqalarini yanada mustahkamlashga qaratilgan.

Ushbu xalqaro forum doirasida O’zbekiston universitetlari ishtirokida tashkil etilgan “Uzbekistan spotlight: Uzbek universities’ role in advancing green energy and industry” (O‘zbekiston diqqat markazida: mamlakat universitetlarining yashil energetika va sanoatdagi roli) mavzusidagi maxsus sessiyada “TIQXMMI” Milliy tadqiqot universiteti faol ishtirok etdi.

Xususan, mazkur sessiyada “TIQXMMI” Milliy tadqiqot universiteti Xalqaro reyting bo‘limi boshlig‘i Ilhom Abdurahmanov moderatorlik vazifasini amalga oshirdi. Bu universitetimizga nafaqat ilmiy, balki tashkilotchi sifatida ham yuqori ishonch bildirilayotganligidan dalolat beradi.

Sessiyada O‘zbekistonning yetakchi oliy ta’lim muassasalari vakillari yashil energiya resurslari, ekologiya va atrof-muhitni muhofaza qilish, suv resurslarini boshqarish, sanoatni avtomatlashtirish va ta’limning barqaror rivojlanish maqsadlariga (BRM) integratsiyasi kabi dolzarb masalalarda o’zlari faoliyat yuritayotgan universitetlar tomonidan amalga oshirilayotgan tashabbuslarni yoritib berishdi.

“TIQXMMI” Milliy tadqiqot universiteti vakili sifatida sessiyada qatnashgan Ezozbek Ozodov o‘z taqdimotida universitet tomonidan ishlab chiqilgan quyosh energiyasiga asoslangan qishloq xo‘jaligi texnikalari, sun’iy intellekt asosidagi irrigatsiya tizimlari va ilmiy-tadqiqot salohiyatini yoritib berdi. Ushbu ishlanmalar nafaqat mahalliy, balki xalqaro ilmiy hamjamiyatda ham katta qiziqish uyg‘otdi.

Jumladan, sessiya yakunida Buyuk Britaniyaning SUMS Consulting kompaniyasi eksperti Dr. Thomas Owen-Smith aynan “TIQXMMI” Milliy tadqiqot universiteti tomonidan ilgari surilgan ishlanmalarga yuqori baho berdi. U O‘zbekistondagi yashil energetika bo‘yicha ilmiy salohiyatni e’tirof etdi hamda ushbu sohadagi hamkorlik imkoniyatlariga katta qiziqish bildirdi.

“TIQXMMI” Milliy tadqiqot universitetining GSDC 2025dagi ishtiroki — bu nafaqat ilmiy yutuqlarni targ‘ib qilish, balki O‘zbekiston oliy ta’lim tizimini global sahnada tanitish yo‘lidagi muhim qadamlardan biridir.