"TIQXMMI" Milliy tadqiqot universitetida Smart Panel loyihasi sinov tariqasida o‘rnatildi
01.04.2025
"TIQXMMI" Milliy tadqiqot universitetining "Gidromelioratsiya" fakulteti 4-bosqich talabasi Yaxyobek Raximberdiyev tomonidan ishlab chiqilgan "Smart Panel" loyihasi universitetga sinov tariqasida o‘rnatildi. Ushbu tizim quyosh panellarining joylashuvini dinamik tarzda moslashtirib, energiya ishlab chiqarish samaradorligini oshiradi.
Loyiha "Green Star" tanlovida g‘olib bo‘lgan Hydroleaders jamoasi a’zolari tomonidan moliyalashtirildi. Jamoa a’zolari Yaxyobek Raximberdiyev va Ruhshona Abduhamidova "Smart Panel" loyihasi bilan ishtirok etib 60 million so‘m mukofot mablag‘ini qo‘lga kiritdi. Ushbu mablag‘ning asosiy qismi "Smart Panel" tizimini universitetga o‘rnatish va sinovdan o‘tkazishga yo‘naltirildi.
"Smart Panel" quyosh nurlanishining burchagini real vaqt rejimida aniqlab, panellarni doimiy ravishda quyoshga perpendikulyar joylashtirish orqali energiya ishlab chiqarishni ancha samarali qiladi.
Loyiha muqobil energiya manbalaridan foydalanish bo‘yicha innovatsion tashabbuslardan biri bo‘lib, kelgusida universitet va sanoat obyektlarida keng joriy etilishi rejalashtirilmoqda.
Universitet matbuot xizmati