Dolzarb tashrif: Malayziya bilan manfaatli hamkorlik

Hamkorlik rishtasi taraqqiyotga kafolat. Agar u ikki tomonlama manfaatga qurilsa, yanada katta ahamiyat kasb etadi. Shuning uchun ham davlatimiz rahbari rivojlangan mamlakatlar bilan oʻzaro tajriba almashish va manfaatli hamkorlikni yoʻlga qoʻyish bobida tinimsiz faoliyat olib bormoqda. Xuddi shu maqsad bilan Prezidentimiz boshchiligidagi Oʻzbekiston delegatsiyasi ayni kunlarda Malayziyada qizgʻin muzokaralar jarayonida boʻlishdi.

Oʻzbekiston va Malayziya oʻrtasidagi diplomatik munosabatlar 1992-yil 7-mayda oʻrnatilgan. Oʻshandan beri ikki davlat siyosiy, iqtisodiy, madaniy va taʼlim sohalarida faol hamkorlik qilib kelmoqda.

Malayziya Oʻzbekistonning mustaqilligini dastlab tan olgan davlatlardan biri hisoblanadi. Ikki davlat oʻrtasida doʻstona aloqalarni mustahkamlash maqsadida yuqori darajadagi rasmiy tashriflar amalga oshirilgan. Jumladan, Oʻzbekiston rahbarlari ham Malayziyaga bir necha bor rasmiy tashrif buyurgan, shuningdek, Malayziya yetakchilari ham Oʻzbekistonga kelib, hamkorlikni kengaytirish boʻyicha muzokaralar oʻtkazgan.

Malayziyada bu galgi tashrif aniq, mamlakatimiz ravnaqiga manfaatli masalalar va takliflar  bilan ajralib turdi. Prezidentimiz dastavval,  Malayziya Islom sanʼati muzeyiga tashrif buyurdi. Moziy muhri boʻlgan ushbu muzey 1998 yilda tashkil etilgan boʻlib, unda 10 mingdan ortiq islom sanʼati namunalari saqlanmoqda. Doimiy ekspozitsiyada Qurʼon qoʻlyozmalarining noyob toʻplami, sopol va qimmatbaho buyumlar, qurol-yarogʻ namunalari va inshootlar maketlari, taqinchoqlar, tangalar va boshqa ashyolar namoyish etilmoqda.

Davlatimiz rahbari eksponatlarni koʻzdan kechirish chogʻida birgalikda tadqiqotlar oʻtkazish va koʻrgazmalar tashkil etish, ilmiy va madaniy almashinuvni kengaytirish muhimligini taʼkidlagani ham eʼtiboran molik.

Rasmiy tashrif doirasida Oʻzbekiston Respublikasi Prezidenti Shavkat Mirziyoyev va Malayziya Bosh vaziri Anvar Ibrohim Kuala-Lumpur shahrida qoʻshma biznes forumida ishtirok etdilar.

Tadbirda ikki mamlakat yetakchi kompaniyalari, investitsiya va bank-moliya institutlarining 200 dan ziyod rahbarlari, jumladan, Malayziyaning “Petronas”, “MMC Corporation”, “DRB-Hicom”, “Gemilang Coachwork”, “Proton”, “Gentari”, “Five Petroleum”, “YTL Corporation”, “Sunview Group”, “KPJ Healthcare”, “MK Tron”, “Mimos”, “Sparco Engineering”, “Tradewinds Group”, “Kapital DX”, “Gamuda”, “Westports”, “Khazanah”, “EXIM Bank of Malaysia” va boshqa koʻplab kompaniyalari vakillari qatnashgani haqidagi xabar hammamizni quvontirdi.

Davlatimiz rahbari oʻz nutqida bugun boʻlib oʻtgan oliy darajadagi samarali muzokaralarda Oʻzbekiston-Malayziya sherikligini innovatsion rivojlantirishning ikki yillik davrini boshlash boʻyicha kelishuvga erishilgani, amaliy hamkorlikning ustuvor yoʻnalishlari belgilab olinganini taʼkidladi.

- Maqsadimiz - munosabatlarni strategik sheriklik darajasiga olib chiqish, - dedi Prezidentimiz oʻz nutqida.

Malayziya Oʻzbekistonning muhim innovatsion va texnologik hamkoridir. Shu maʼnoda, davlatimiz rahbari Oʻzbekiston-Malayziya ishbilarmonlik hamkorligini yanada rivojlantirishning qator ustuvor yoʻnalishlarini koʻrsatib oʻtdi. Bu, eng avvalo, elektronika va yarimoʻtkazgichlar sanoatida uzoq muddatli hamkorlikni kengaytirishdir. Sunʼiy intellekt, raqamli texnologiyalar, maʼlumot markazlari boʻyicha loyihalarni amalga oshirish mumkinligi qayd etildi.

Qurilish sohasining jadal rivojlanishi innovatsion va ekologik toza qurilish materiallariga talabni oshirmoqda. Oʻzbekiston Prezidenti Malayziya kompaniyalarini mamlakatimiz hududlarida zamonaviy ishlab chiqarish quvvatlarini tashkil etish va keng koʻlamli bunyodkorlik ishlarida faol ishtirok etishga chaqirdi.

Sogʻliqni saqlash sohasidagi oʻzaro manfaatli hamkorlik istiqbollari qayd etildi. Zamonaviy klinikalar qurish, Malayziyaning ilgʻor tajribasi asosida innovatsion farmatsevtika mahsulotlari ishlab chiqarish shular jumlasidan.

Davlatimiz rahbari Malayziyaning yetakchi kompaniya va banklarini Oʻzbekistonning telekommunikatsiya, energetika, bank-moliya va boshqa sohalardagi davlat aktivlarini xususiylashtirishda faol ishtirok etishga taklif etdi.

Bundan tashqari, geologiya, taʼlim, transport, ziyorat turizmi kabi yoʻnalishlarda hamkorlik qilish uchun katta salohiyat mavjudligi taʼkidlandi. Ayniqsa,  taʼlim darajasi va samarasi bobida rektorlar forumining tashkil etilishi katta ahamiyat kasb etdi. Ilm-fanning turli yo‘nalishlari bo‘yicha tajriba almashishga imkon tug‘dirdi,  desak, xato bo‘lmaydi.

Soʻzining yakunida davlatimiz rahbari navbatdagi qoʻshma biznes forumini shu yil kuzda Oʻzbekistonda oʻtkazishni taklif etdi.

Ushbu tashrifning quvonarli va gʻururlanarli jihati shundaki, prezidentimizni kutib olishga Malayziya parlamenti spikeri chiqqani, malayziyalik hamkasblarimizning aytishicha, ushbu mamlakat protokol amaliyotida ilgari kuzatilmagan voqea boʻldi. Bundan tashqari, Malayziya bosh vaziri Anvar Ibrohim prezidentimiz Shavkat Mirziyoyevga butun kun davomida, barcha rasmiy tadbir va uchrashuvlarda hamrohlik qildi. Hattoki muloqotni davom ettirish uchun Oʻzbekiston prezidentiga ajratilgan qarorgohga shaxsan tashrif buyurgani,  keyin ular birgalikda, bir mashinada Petronas bosh qarorgohiga yoʻl olishgani, u yerda kompaniya rahbariyati bilan uchrashuv oʻtkazgani haqida Prezident matbuot kotibi Sherzod Asadov xabar berdi. Bu esa oʻzaro manfaatli hamkorlikka ishonch, Prezident va uning xalqiga mehr va sodiqlikning nishonasidir.

Rahimboy Jumaniyozov,

"TIQXMMI" MTU professori, Oʼzbekiston Yozuvchilar va Jurnalistlar uyushmalarining aʼzosi